8M: Día Internacional da muller

Con motivo do 8 de marzo, Día Internacional da Muller, realizamos diferentes actividades que nos serven para reflexionar, lembrar e reivindicar a loita histórica das mulleres pola igualdade de dereitos, oportunidades e recoñecemento en todos os ámbitos da sociedade.

Todos os integrantes da comunidade educativa, elaboramos un mural conxunto realizado coas fotografías das mulleres importantes na vida de cada un/unha.

Lembramos ás mulleres da xeración do 27, coñecidas como “As sinsombreiro”, que tiveron a valentía de alzar a súa voz e de facerse escoitar co xesto de sacar o sombreiro cando lles estaba prohibido.

Esta homenaxe vai centrada na figura de MARUJA MALLO por ser unha muller galega e lucense e integrante da xeración do 27.

As nenas e nenos de infantil, pintaron diferentes tipos de sombreiros para facer un mural. Tamén bailaron ao son da música dos anos 20 e lanzaron os sombreiros ao aire en lembranza destas mulleres.

O alumnado de terceiro ciclo, ademáis, afondou na vida de Margarita Manso, Victorina Durán, Luisa Carnés, Concha Méndez ... e todas as mulleres da Xeneración do 27 que desenvolveron unha actividade constante e destacada en campos como a literatura, a poesía, a pintura, a música, o cinema ou a filosofía, e, que moitas delas, acabaron exiliadas tras o estalido da Guerra Civil Española.