Dende o Ceip Anexa de Lugo, dámosvos a benvida a este novo recunchiño:
Este blog, ten como finalidade, divulgar os nosos traballos, compartir ferramentas e dar a coñecer as actividades que realizamos; todas elas, pensadas e deseñadas para fomentar o uso da nosa lingua: O GALEGO!
Sede todos/as BENVID@S!
O idioma é a chave
coa que abrimos o mundo:
o salouco máis feble,
o pesar máis profundo.
O idioma é a vida,
o coitelo da dor,
o murmurio do vento,
a palabra de amor.
O idioma é o tempo,
é a voz dos avós
e ese breve ronsel
que deixaremos nós.
O idioma é un herdo,
patrimonio do pobo,
maxicamente vello,
eternamente novo.
O idioma é a patria,
a esencia máis nosa,
a creación común
meirande e poderosa.
O idioma é a forza
que nos xungue e sostén.
Se perdemos a fala
non seremos ninguén!
O idioma é o amor,
o latexo, a verdade,
a fonte da que agroma
a máis forte irmandade.
Renunciar ao idioma
é ser mudo e morrer.
Precisamos a lingua
se queremos vencer!
Manuel María - A Fala
