PESCANDO CONTOS CON ANXO MOURE

O alumnado de E.Infantil e 1º ciclo  de E.Primaria, tivo a sorte de "ir pescar" no batuxo de Anxo Moure, contacontos do proxecto "21 días co galego".

Os contos de Anxo Moure, falan sobre a lingua da auga, de fervenzas, de ríos, de mares, de xacias e peixes... alimentan a nosa imaxinación e énchennos de moita risa e ledicia!. 

Gozamos moito da visita de Anxo na que cantamos, bailamos, demos aloumiños, apertas, e sobre todo, recibimos mensaxes ben fermosas sobre o respecto e o coidado do noso entorno e toda a natureza.

"O mar bate no noso corazón 

porque está preocupado pola contaminación"

DÍA DE ROSALÍA DE CASTRO 2026

 

Conmemoramos O Día de Rosalía de Castro lembrando a súa vida e recitando e cantando fragmentos da súa obra.

Para escoitar, preme nas imaxes:

          

 

1ºA EP: "Eu ben vin estar o moucho"

1ºB E.P: "Eu ben vin estar o moucho"

6º EP: "Cantarte hei Galicia"

ENTROIDO 2026

Comezamos a conmemoración do Entroido furgando e descubrindo a orixe e historia da figura do  Meco. 

Unha vez elaborado o noso Meco, expuxémolo no corredor para comezar a cumprir os seus mandados.

Coñecimos tamén personaxes típicos do Entroido Galego:

Este ano, como a temática escollida para o Entroido foi "A granxa", estes foron os  mandados do Meco:

Luns: Orellas, fuciño ou rabiño has de poñer 

para una animaliño de granxa parecer. 

Martes: Se queres ter saude e cordura,

identifícate cunha froita ou verdura.

Mércores: Moi importante!

 Non esquezas un sombreiro

para que o espantallo semelle un cabaleiro.

Xoves: Para na granxa traballar,

un pano na cabeza ou camisa de cadros tés que levar!

 E o venres: Festa de Entroido!!

Houbo regueifa entre profesorado e alumnado, desfile de comparsas, e por suposto, música e moita algarabía e balbordo!

Educación Infantil: animaliños da granxa

1º Ciclo de E.Primaria: Froitas e verduras

2º Ciclo de E.Primaria: Espantallos

3º Ciclo de E.Primaria: Granxeiros

E que mellor xeito de rematar a festa de Entroido, que comendo doces típicos destas datas: orellas, filloas, rosquillas ...

PLANTANDO ÁRBORES CON PINCEIS

O alumnado de 3º ciclo de E.Primaria, realizou a actividade titulada  "Plantando árbores con pinceis",  presentada por Afundación Abanca en colaboración coa asociación de arte urbana "Vella Escola".

Este  proxecto  une cultura e coidado do mediambiente , a través da realización no centro dun mural artístico e obradoiros de estampaxe, que teñen como obxectivo achegar ao noso alumnado unha mensaxe positiva sobre o coidado da contorna e fomentar o respecto ao medio natural a través dunha metodoloxía participativa e colaborativa.

Utilizáronse pinturas fotocatalíticas anticontaminación que non só non contaminan, senón que ademais, absorben e depuran os contaminantes que hai no aire, como os óxidos de nitróxeno e outros gases contaminantes da industria e o tráfico rodado.

Cada metro cadrado desta pintura equivale  ao efecto depurativo dunha árbore adulta.

Mural no corredor do colexio.

Obradoiro de estampaxe